Monday, December 10, 2018
Home > विचार/अन्तर्वार्ता > दुईतिहाई बहुमतको सरकार निरिह किन?

दुईतिहाई बहुमतको सरकार निरिह किन?

सञ्चारक
काठमाडौँ, असोज ।
एउटा लक्ष्य र योजना बिना कुनै काम सफल हुँदैन भन्ने कुरा आज दुइतिहाई सरकारको निरीह पारा देख्दा जो कसैलाई छर्लङ्ग हुन्छ । सायद कसैले पनि सोचेको थिएन होला यो सरकार यतिसम्म निकम्मा होला भनेर । सोचेको थिए नेपालमा दुइतिहाई बहुमतको सरकार बन्यो अब एउटा भिजन बन्ने छ । देश समृद्ध बन्ने छ । जस्तो सुकै योजना बनाए पनि पाँच वर्षमा सबै पुरा हुनेछन् । भ्रष्टाचारको अन्त्य हुनेछ । कर्मचारीहरुले सहि तरिकाले काम गर्ने छन् ।

काम नगर्ने ठग कर्मचारीलाई अन द स्पट कारर्वाही हुनेछ । कम्युनिष्ट पार्टीको सरकार भएको हुँदा जनताको भावना अनुसार काम होला । दण्ड हिनताको अन्त्य होला । बलात्कारीलाई कडा भन्दा कडा कारवाही होला । न्याय सबैको लागी बराबर होला । वैदेशिक रोजगारीमा जानेहरुको लर्कोमा कमी आउँला । स्वदेश मै रोजगारीको अवसर मिल्ला । नेता तथा मन्त्रिहरुले जनताको अपेक्षा अनुसार काम गर्लान् ।

स्वास्थ्य, गाँस, वास, कपासको व्यवस्था नभएका गरिव निमुखा जनताको हक हितमा काम गर्ला भन्ने ठुलो आसा अभिलासा बोकेर कम्युनिष्ट पार्टीको गुण गान गाउँदै जनताको घरघरमा गएर भोट माग्ने र गीत संगीतबाट जनतालाई प्रभावित पार्ने काम हामी कलाकारबाट धेरै नै योगदान भयो जस्तो लाग्छ तर आज आएर आफ्नै काम प्रति पछुतो मान्नु पर्ने अवस्था आएको छ ।
किन यो सरकारले जनताको भावना अनुसार अगाडि बढ्ने चेष्टा गरेन ? किन परिणाम मुखि काम हुन सकेन ? किन निर्मला पन्तको बलात्कारी र हत्यारा पत्ता लागेन र सोही व्यक्तिलाई कार्वाही गर्न सकेनन् । किन यातायातको सिण्डीकेट तोडियो भनेर जनताको आँखामा छारो हाल्ने काम मात्र ग¥यो ? किन शिक्षा र स्वास्थ्य क्षेत्रको विकृत्ती अन्त्य हुन सकेन ? किन बजार भाउ आकासियो ? किन कि यो सरकार र यसका मन्त्रिहरु जनता प्रति उत्तरदायी छैनन् भन्ने बुझिन्छ ।

यी सबै आ – आफ्नो स्वार्थ पुर्ति गर्न आफ्ना नाता गोता र कुटुम्बलाई जागिर दिन गएका हुन् कि भन्ने भान हुन थालेको छ । बुझ्न सकिएन आखिर किन यस्तो हुँदैछ कसैलाई वास्ता छैन । छ त केवल पद एैस, आराम र दौलतको मात्र चिन्ता छ । देशको सिमा मिचिंदा सम्बन्धित निकाय कानमा तेल हालेर बसेको छ । खुलेआम विखण्डनको कुरा गर्ने विखण्डनकारीलाई कार्वाही हुनसकेको छैन । झन मलजल गर्ने काम गरेको छ ।

यस्तो हुँदा पनी न प्रधानमन्त्री बोल्छन् न पार्टी बोल्छ न त पार्टीले सरकार यसरी अगाडी बढोस् भनेर सल्लाह सुझाव दिन्छ । मन्त्रिहरुले विवादास्पद काम मात्र गरेका छन् । जति वेथिती हुँदा पनी चुँइक्क बोल्दैनन् । यसको जवाफ जनताले बुझ्न चाहन्छन् । आफ्नै पार्टीको सरकार छ तर एकथरी पक्ष र अर्कोे थरी विपक्ष भए जसरी प्रस्तुत हुन्छन् । बैठक बस्ने, कार्य योजना बनाउने र त्यहीँ योजना अनुसार काम गर्ने कुनै सिस्टम छैन ।

जे मन लाग्यो त्यहि गर्ने परिपाटीले अर्को चुनावसम्म यो पार्टीको हविगत के हुने हो । किन–किन आज भोलि मन खिन्न हुन थालेको छ । पटक–पटक पार्टीलाई झकझकाउँदा पनी हाम्रो कुराको सुनवाई भएन । केहि सुधार होला भनेर पहिले पनी प्रधानमन्त्रीलाई खुला चिठि लेखेको थिए तर त्यो अनुसार काम होला कार्यकर्ताको कुरा सुन्लान भन्ने जुन आशा थियो त्यो पनी मरेर गएको छ ।

कार्यकर्ता र जनताको आवाज सुनेको भए र त्यो अनुसारको कदम चालेको भए पक्कै पनी यो सरकारले इतिहास रच्ने थियो त्यो मौका गुमाएको छ । अझै पनि समय निकै छ । तर आशा गर्ने ठाउँ भने छैन इमान्दारी नेता कार्यकर्ता पाखा लगाउँदै भ्रष्ट र घुसखोरीलाई पार्टीमा पुरस्कृत गर्दाको यो परिणाम आएको हो जस्तो लाग्छ । नत्र जनताको पक्षमा काम नगर्ने मन्त्रिलाई घोक्रेठयाक लगाएर हटाउन किन सक्दैनन् प्रधानमन्त्री १ किनकी यो सरकार दलाल र भ्रष्टहरुको चुंगलमा फसेको छ नत्र गर्न खोजेको कामबाट पछि हट्नुको कारण के हो रु सुन काण्ड त्यसै सेलायो सुन्छु आफ्ना नजिकका पर्ने डरले कार्वाही गरिएन त्यो हो भने सरकार त्यसमा पनि चुक्यो किन की अपराधी अपराधी नै हुन्छ आफ्नो र अर्काको भन्ने हुँदैन ।

यातायातको सिण्डीकेट पनि त्यत्तिकै सेलायो । यातायातको सिण्डिकेट बचाउन मन्त्री नै लागे भन्ने सुन्नमा आएको छ । सिण्डिकेट हटाउन खोज्ने कर्मचारी पनि सरुवा गरेपछी अव केको आशा गर्नु आफु खुसि देश र जनताको विरुद्ध जाने मन्त्री र कर्मचारीलाई कार्वाही गर्ने, वर्खास्त गर्ने अधिकार हुँदा–हुँदै त्यो विषयमा प्रधानमन्त्रीले कार्वाही नगर्नु विडम्बना नै भन्नु पर्छ । यदि सरकारले साँच्चिकै सुशासन ल्याउन चाहेको हो भने कडा कदम चालोस । काम नगर्ने र भ्रष्ट मन्त्रिहरुलाई हटाएर राम्रा देश र जनताको पक्षमा काम गर्ने मन्त्री राखेर जनहितमा काम गरोस ।

आपसमा भिडेर हैन, मिलेर कार्य योजना सहित राम्रो काम गर्नेलाई पुरस्कृत गर्दै र जनहित विपरित काम गर्नेलाई दण्डित गर्दै अगाडि बढोस्, हैन नसकिने रहेछ भन्ने लागेको छ भने विकल्प खोज्न जरुरी देखिन्छ । नत्र पाँच वर्ष पछि पार्टीभित्र सिला खोज्नु पर्ने अवस्था आउनेछ । सबै सम्वन्धित निकायले मनन गरुन् यो मेरो व्यक्तिगत विचार हो कसैले अन्यथा नलिनु होला । यो लेखबाट पनी सरकारको चेत खुलेन भने कडा प्रहार सहितको गीत आउने छ त्यो पचाउन निकै गाह्रो हुनेछ ।

गायक, मोतिराज खनाल
अर्घाखाँची–सितगंगा २
सितापुर

%d bloggers like this: