Monday, May 21, 2018
Home > समाचार > गठबन्धनको निर्णयमा ‘सीमानाकाको धर्ना’ बेपत्ता/आन्दोलन खुकुलो पार्ने सङ्केत

गठबन्धनको निर्णयमा ‘सीमानाकाको धर्ना’ बेपत्ता/आन्दोलन खुकुलो पार्ने सङ्केत

gathbandhan_meeting_Birgunj
सञ्चारक
वीरगञ्ज, माघ १८ ।

मधेशमा आन्दोलनरत सङ्घीय समावेशी गठबन्धनले आन्दोलन लम्बिएकोले मधेशको जनजीवन कष्टकर भएको भन्दै जनताका कठिनाइउपर सहानुभूति राख्दै आन्दोलनका कार्यक्रमहरुलाई समयानुकूल बनाउने निर्णय गरेको छ ।
गठबन्धनको वीरगञ्जमा सम्पन्न दुईदिने बैठकपछि जारी विज्ञप्तिमा मधेशका जिल्लामा आवधिक आमहड्ताल गर्ने भन्दै आन्दोलनका कार्यक्रमलाई खुकुलो बनाउने संकेत दिएको छ । आन्दोलनका कार्यक्रमहरुलाई परिमार्जन गर्नुपर्ने भन्दै आएको गठबन्धनको सो विज्ञप्तिमा सीमानाकामा भइरहेको धर्नाबारे उल्लेख गरिएको छैन ।
बैठकमा आन्दोलनको क्रममा भइरहेको आमहड्ताल र बन्दले परेको असर र भावी रणनीतिका बारेमा समीक्षा गरिएको गठबन्धनका एउटा घटक रामसपाका प्रवक्ता केशव झाले बताए ।
बैठकले आन्दोलनका सबै कार्यक्रमहरुलाई निरन्तरता दिने र आन्दोलनलाई अझ प्रभावकारी र परिणाममुखी बनाउन कार्यक्रमहरु तर्जुमा गर्ने भनिएको छ । सीमानाका धर्नाबाहेक विगतमा जारी अन्य कार्यक्रमहरु विरोधसभा, जनप्रदर्शन, जनजागरण कार्यक्रम आदि उल्लेख छन् । गठबन्धनका नेता नेपाल सदभावना पार्टीका अध्यक्ष अनिलकुमार झाले सीमानाकाको धर्ना विगतकै कार्यक्रम रहेको । विज्ञप्तिमा ती कार्यक्रम निरन्तर रहने भनिएको हुँदा सोको उल्लेख नभएको बताए ।
गठबन्धनले एउटै महागठबन्धन, एउटै मागपत्र र एउटै वार्ता टोली बन्नुपर्ने भन्दै महागठबन्धनका लागि सहमत हुन संयुक्त लोकतान्त्रिक मधेशी मोर्चालाई आग्रह गरेको छ । सरकारले मोर्चासँग गर्दैआएको वार्तालाई नै मधेश आन्दोलनको सन्दर्भमा आधिकारिक मानिँदैआएको छ ।

विद्यमान आन्दोलन र वर्तमान राजनितिक गतिरोध मूलतः मधेशस“ग सम्बन्धित भएको भन्दै गठबन्धनले आफूहरु मधेश केन्द्रित आन्दोलनको पक्षमा रहेको प्रष्ट पार्दै आन्दोलनको कार्यक्षेत्रका बारेमा विचलित धारणा नबनाउन मधेशी मोर्चालाई आग्रह गरेको छ । मोर्चाका एउटा प्रभावशाली घटक सङ्घीय समाजवादी फोरम नेपालले आन्दोलनलाई सशक्त र निर्णायक बनाउन काठमाडौंकेन्द्रित गर्ने निर्णय केही दिनअघि सम्पन्न केन्द्रीय समितिको बैठकबाट गरेको थियो ।
गठबन्धनको बैठकले राज्यले आन्दोलनरत संगठनसँग वार्ताको नाटक मात्र गरेको भन्दै राज्यको गैरजिम्मेवार र संवेदनहीन रवैयाको निन्दासमेत गरेको छ ।
बैठकमा गठबन्धनका घटक दलहरु रामसपाका अध्यक्ष शरतसिँह भण्डारी, नेसपाका अध्यक्ष अनिलकुमार झा, फोरम गणतान्त्रिकका अध्यक्ष राजकिशोर यादव र तमरा अभियानका संयोजक जयप्रकाश गुप्तालगायतका सम्बद्ध दलका नेताहरु सहभागी भएको बताइएको छ ।

Leave a Reply

Your email address will not be published. Required fields are marked *

%d bloggers like this: