Sunday, February 18, 2018
Home > विचार/अन्तर्वार्ता > सहिद परिवारलाई राहत बाँडने छौं : सञ्जीव झा, नेता, युवा सङ्घ

सहिद परिवारलाई राहत बाँडने छौं : सञ्जीव झा, नेता, युवा सङ्घ

Sanjeev _Jha_Yuva _Sangh
झट्ट हेर्दा उनी आकर्षक छन् र युवा राजनीतिमा आफ्नो प्रभाव पनि पसारेका छन् । तर उनका कुराहरुलाई आन्दोलनकारीहरुले सारै दुच्छर मान्छन् । उनका कुराहरु गम्भीर र संवेदनशील नभएर सत्तारुढ दलका धारणालाई पुष्ट्याइँ गर्ने भातृसंस्थाका कार्यकर्ताको गफका रुपमा लिन्छन् । तर चर्चा त उनकै छ । अर्थात् सञ्जीव झा । युवा सङ्घका नेता । उनीसँग सञ्चारकले कुराकानी गरेको छ । प्रस्तुत छ बातचीतको संक्षेप ।

 

 

 

एमालेनेतृत्वको सरकारले मधेशीहरुलाई टाउको र छातीमा गोली हान्दैछ । तपाईंजस्ता मधेशीहरुलाई पिरलो हुँदैन ?

  • कुनै पनि मधेशीलाई छाती र टाउकोमा गोली लाग्दा मात्र होइन, गोडामा पनि चोट लाग्दा मलाई मात्र होइन मसँगका साथीहरुलाई पीडा हुन्छ । तर काँग्रेसका सभापति सुशिल कोइरालालाई प्रधानमन्त्रीमा भोट हाल्न जानेहरुको आव्हानमा सोझासाझा जनताले तथाकथित अधिकारका नाउँमा छाती र गोली खाए । मलाई लाग्छ, जनतालाई उकास्ने र उत्तेजित बनाउनेहरु यसमा बढी दोषी छन् । मलाई प्रश्न गर्न मन छ कि आन्दोलकारी भन्नेहरुलाई ती जनताको माया किन भएन । के उनीहरु जनताहरुको रगतको सोझो गर्न संविधानसभामा गएका थिए ।

भनेपछि मृत्युको पीडा र सन्ताप तपाईलाई छँदैछैन ?

  • अनावश्यक आवेश र भावजनामा आएर मृत्युबरण गर्ने ती वीर मधेशी पुत्रहरुको र पहिलो मधेश आन्दोलनमा सहिद भएकाहरुलाई म भावपूर्ण श्रद्धाञ्जली व्यक्त गर्छु । किनभने हरेक मृत्युले मलाई संवेदनशील बनाउँछ । म पनि शोकाकूल हुन्छु । तर एउटा दुखद अवस्थालाई म पनि अनुभव गरिरहेको छु कि जीउँदो शरीरलाई मात्र होइन, मृत शरीरलाई पनि व्यक्तिगत स्वार्थका लागि प्रयोग गरिएका छन् । सहिद परिवारको बिल्लीबाँठ भएको छ । आर्थिक विपदामा छन् मर्नेहरुका आफन्त । यस्तो दयनीय संकटबाट गुज्रिरहँदा ती व्यक्तिहरुलाई उक्सानेहरु कहाँ छन् भन्ने प्रश्न गर्नुपर्ने होइन र ? यस्तोमा अहिलेका प्रधानमन्त्रीज्यूले तत्काल ती सहिद परिवारका लागि सामाजिक सुरक्षासहित सहज जीवनयापनलाई सुनिश्चित गर्ने निर्देशन दिनुभएको छ । युवा सङ्घ नेपालले पनि यसमा योगदान पुर्याउने कामलाई आफ्नो दायित्वको रुपमा लिएको छ । हामी चाडै नेपाली कलाकारहरुको संलग्नतामा च्यारिटी शो गरेर पीडितहरुलाई राहत पुर्याउन रकम संकलन गरी नेपाल सरकारमार्फत ती सहिदहरुको दैलोसम्म पुर्याउँछौं ।

मान्छे मार्ने अनि सहिद परिवारलाई राहत पुर्याउने भनेको आफैँ बोक्सी आफैँ झाक्री हुने काम भएन र ?

  • मैले सुरुमै भने ती जनतालाई आन्दोलनको नाउँमा आवेग र आक्रोशमा ल्याएर कसरले मर्न उक्साए । यस कुराको छिनोफानो हुनुपर्छ । जसले मार्न लगाए उनीहरुको गैरजिम्मेवारीपनलाई दोष दिनुपर्छ । बरु हामीले अब ती सहिद परिवारका लागि के गर्न सक्छौं भन्नेतिर लागेका छौं ।

अब मधेश आन्दोलनको निकास के छ त ?

  • संवाद र सहकार्यबाटै सहमति हो । आन्दोलनकारी दलहरुले अनावश्यक अडानलाई परित्याग गरेर सार्थक वार्ताका लागि पक्षमा आएपछि आफसेआफ समाधान हुन्छ । बलमिच्याइँ गरिरहँदासम्म त समस्या मात्र थपिने हो नि ।

भनिन्छ, एमालले आफ्नो अडानबाट पछि नहट्नाले सार्थक संवाद भइरहेको छैन ?

  • एमालेलाई हिमालपहाडमा मात्र नभएर मधेशमा के कुराको खाँचो छ र त्यसलाई पुरा गर्न के गर्नुपर्छ भन्ने कुरा कसैले सिकाउनु पर्दैन । अनावश्यक कुराहरु तेर्साएपछि संवादहीनताको स्थिति आउँछ । जायज कुरामा छलफल गर्न एमाले सधैँ तयार रहँदै आएको अवस्था छ ।

तर वार्तालाई टुङ्गोमा पुर्याउने सरकारको जिम्मेवारी होइन र ?

  • हो । तर आफ्नै गोरुको बाह्रटका भनेजस्तै आन्दोलनकारीहरुले ढिपी गरिरहँदा समस्या बल्झिदैँ गएको हो । सरकारले सबै दललाई विश्वासमा लिएर संविधान संशोधन गराएको छ । जसमा आन्दोलनका मागहरुलाई सम्बोधन गरिएको छ । तर त्यसमा पनि चित्तनबुझ्ने भनेपछि त मधेशवादी दलहरुलाई आन्दोलन गर्ने रहर नै पलाएको जस्तो देखियो नि । अहिलेको बन्द र हड्तालले मधेशी जनता पनि पीडित छन् । उनीहरुका दिनचर्या कष्टकर बनेको छ । एउटा जिम्मेवार राजनीतिक शक्तिको रुपमा बन्द र हड्ताललाई फिर्ता लिएर मधेशी जनताको जीवनलाई सहज बनाउने काम मधेशी मोर्चाको होइन र ? अपेक्षा गर्नेहरुले आफ्नो दायित्वलाई पनि बुझ्नुपर्छ ।

Leave a Reply

Your email address will not be published. Required fields are marked *

%d bloggers like this: