Monday, September 24, 2018
Home > समाचार > एलडीओ बेपत्ता भएपछि करोडौं चट्ट !

एलडीओ बेपत्ता भएपछि करोडौं चट्ट !

DDC Saptari

सञ्जीवविक्रम शाह

सप्तरी, माघ १० ।

मधेश आन्दोलनका कारण सप्तरीमा नगरपालिका तथा गाउँ विकास समितिको परिषद् समयमै हुन नसक्दा करौडौं रुपियाँ विकास बजेट फ्रिज हुने सम्भावना बढ्दै गएको छ । आगामी आर्थिक वर्षका लागि चालू आर्थिक वर्षमा नीति तथा कार्यक्रम एवं गत वर्षको कार्य प्रगति समीक्षा गरी नगर तथा गाउँ परिषदबाट पारित गराउनुपर्ने र चालु आर्थिक वर्षको पुस मसान्तभित्र अनिवार्यरुपमा नगरपालिका र गाउँ विकास समितिले परिषद गराइ सक्नुपर्ने स्थानीय स्वायत्त शासन ऐनमा व्यवस्था रहे पनि सप्तरी जिल्लाको कुनै पनि नगरपालिका र गाविसको अहिलेसम्म परिषद हुन सकेको छैन ।

चालू आर्थिक वर्षकै दोस्रो महिना भदौदेखि मधेश आन्दोलनका कारण स्थानीय निकाय, सरकारी तथा निजि कार्यालय, बैंक तथा वित्तिय संस्थाको सेवा बन्द रहँदै आएको छ ।  समयमा परिषद नहुँदा आगामी वर्षका योजना, विकास कार्य प्रभावित भएसँगै निकासा भई आएको विनियोजित बजेट खर्च गर्न सकिदैँन । यता परिषद नभएपछि नगरपालिका र गाविस कार्यालयहरुले न्यूनतम शर्तमापन तथा कार्यसम्पादनमा असफल हुने निश्चित रहेको जिविस कार्यालय सप्तरीले जनाएको छ ।

नगरपालिका र गाविसको परिषदपछि फागुन मसान्तभित्र जिल्ला विकास समितिको परिषद गरेमा जिविसलाई उत्तीर्ण हुनका लागि अंक थपिन्छ । । सप्तरीमा पुरानो र नयाँ गरी ५ ओटा नगरपालिका र ९३ वटा गाविस रहेका छन् । सञ्चालन र पूँजीगत गरी औसतमा प्रति गाविसमा १५ देखि २५ लाखसम्मको बजेट विनियोजन भई जाने गरेको जिल्ला विकास समिति सप्तरीको कार्यालयले जनाएको छ । यसरी वर्षमा करिब १८ करोड रुपियाँ गाविसमा निकासा भई जाने गरेको जिल्ला विकास समिति सप्तरीका लेखापाल रामनारायण महतोले जानकारी दिए । उनले भने–‘चालु आर्थिक वर्षमा तलबबाहेक कुनै किसिमको कसैलाई निकासा भएको छैन ।’

जिल्लामा राजविराज, कंचनपुर, शम्भुनाथ, सप्तकोशी र योगिनीमाई नगरपालिकाको विकाससम्बद्ध कामसँगै दैनिक कामकाज नहुँदा नगरपालिकाको करोडौ राजस्व गुम्ने खतरासमेत बढेको नगरपालिकाका प्रमुखहरुले बताएका छन् । नगर र गाविसको परिषद् गराउन कतैबाट कसैले न त सहयोग गरेको छ, न त कसैले निर्देशन नै दिएका छन् । परिषद् गराउन निर्देशन दिने निकाय जिल्ला विकास समिति सप्तरीमा मोर्चाको आन्दोलनसँगै स्थानीय विकास अधिकारीको अनुपस्थिति रहनुले समन्वय हुन नसकेको देखिन्छ ।

Leave a Reply

Your email address will not be published. Required fields are marked *

%d bloggers like this: