Tuesday, November 20, 2018
Home > समाचार > फोरम नेपालको बैठकमा नेतृत्वको कडा आलोचना

फोरम नेपालको बैठकमा नेतृत्वको कडा आलोचना

Foroum meeting

‘काठमाडौंले ठूलो धक्का दिन जरुरी छ ।’
सञ्चारक
काठमाडौं, माघ ९ ।
शुक्रबारबाट जारी सङ्घीय समाजवादी फोरम नेपालको देस्रो केन्द्रीय समितिको बैठकमा पार्टी नेतृत्वको कडा आलोचना भएको छ । मधेश आन्दोलनका बीच पार्टीले प्रधानमन्त्रीको निर्वाचनमा सहभागिता जनाएको, काठमाडौंकेन्द्रित आन्दोलनलाई प्रथमिकता नदिएको र इन्धन तस्करीलाई निरुत्साहित गर्न रणनीति बनाउन नसकिएको भन्दै पार्टीका केन्द्रीय सदस्यहरुले नेतृत्वको खुलेरै आलोचना गरेका छन् ।
आज बोलेका बैठकका सहभागीहरुले आन्दोलनलाई निर्णायक बनाउन पार्टीले ठोस रणनीति तय गर्नुपर्ने पनि सुझाएका छन् ।
यसैगरी आजको बैठकमा पार्टीको राजनीतिक, सांगठनिक र आर्थिक प्रतिवेदनमाथिको छलफल सुरुभएको छ । आजै सम्पन्न हुने भनिएको बैठक समयाभावका कारण केन्द्रीय सदस्यहरुले बोल्न बाँकी भएपछि आइतबार ११ बजे पुनः बस्ने केन्द्रीय सदस्य शैलेन्द्रप्रसाद साहले बताए ।
‘मधेशका जिल्लाहरु जस्तो काठमाडौं र जनजाति बाहुल्य क्षेत्रमा आन्दोलन उठ्न नसकेकोमा पार्टीले यसको कारण पत्ता लगाई समिक्षा गर्नु पर्छ’– केन्द्रीय सदस्य वीरबहादुर लामाले बैठकमा भने, ‘काठमाडौंले ठूलो धक्का दिन जरुरी छ ।’ ‘शान्तिपूर्णरुपमा पाँच महिनादेखि आन्दोलनरत मधेशी जनताको टाउको र छातीमा ताकी ताकी गोली हानी हत्या गर्न पल्केको सरकारलाई तह लगाउन काठमाडौं केन्द्रीत आन्दोलन चर्काउनै पर्छ’– उनको भनाइ थियो । पहिचान र अधिकारका लागि प्रहरीको गोली खाएर मधेशी जनता सडकमा मरिरहँदा पनि काठमाडौं र जनजातिबहुल क्षेत्रमा आन्दोलन उठ्न नसकेकोप्रति उनले चर्को असन्तुष्टि पनि पोखेका छन् ।
केन्द्रीय सदस्य विश्वनाथ पटेलले मधेश आन्दोलनमा चरम दमन भएकोले सरकारलाई अन्तर्राष्ट्रिय अदालत उभ्याउनका लागि तत्काल पहल थाल्न पार्टी नेतृत्वलाई सुझाव दिएका छन् । अर्का केन्द्रीय सदस्य आरसी तुङ्बाले वार्ताभन्दा पनि माग तुहाउन सरकार चरम दमनमा उत्रेको आरोप लगाए । आन्दोलनसँगै राजनीतिक गतिरोध अन्त्यका लागि पनि पार्टीले ठोस कदम चाल्नुपर्ने उनीहरुले बताए ।
राजनीतिक प्रतिवेदनमा वर्तमान राजनीतिक परिस्थिति, संविधानसभा प्रतिक्रान्तिको साधन र नयाँ संविधान प्रतिक्रान्तिको उपज, नयाँ संविधानका प्रतिगामी तथा यथास्थितिवादी धाराहरु, समानुपातिक समावेशी लोकतन्त्रको कसीमा नयाँ संविधान, प्रतिगामी संविधानविरुद्धको सदन र सडकमा पार्टीको संघर्ष, तराई–मधेस–थरुहटमा आन्दोलन र विद्रोह, मोर्चा र सरकारबीच भएको वार्तालगायतका विषयवस्तु समेटिएका छन् । नेपालका सबै परिवर्तनको निर्णायक केन्द्र काठमाडौं भएकोले राष्ट्रिय आन्दोलन काठमाडौंकेन्द्रित हुनुपर्ने प्रतिवेदनमा उल्लेख गरिएको छ ।
पहिचानकेन्द्रीत राजनीतिक शक्तिहरुसँग बृहत् गठबन्धन गर्दै काठमाडौंकेन्द्रित विद्रोह हुनुपर्ने निष्कर्ष प्रतिवेदनमा निकालिएको छ ।

%d bloggers like this: