Tuesday, January 22, 2019
Home > समाचार > काठमान्डूका अधिकारकर्मी किन मौन : महतो

काठमान्डूका अधिकारकर्मी किन मौन : महतो

Rajendra Mahato

सञ्जीवविक्रम शाह
राजविराज, माघ ८ ।

सद्भावना पार्टीका अध्यक्ष राजेन्द्र महतोले सरकारले नै शान्तिपूर्ण आन्दोलनलाई हिँसात्मक बनाउन खोजेको बताएका छन् । सप्तरीको मुसहर्नियामा आयोजना गरिएको विरोधसभामा बोल्दै महतोले हिजोको रंगेली घटनातर्फ इंगित गर्दै सरकार आन्दोलनलाई हिंसात्मक बनाउन लागि परेको आरोप लगाए । ‘शान्तिपूर्ण आन्दोलनमा प्रहरीले छाति र पिठ्युमा ताकेर गोली किन हान्नु पर्यो भन्ने उनले प्रश्न गरे ।
प्रदेश सीमाङ्कन परिवर्तनको माग मधेशी मोर्चाको बटमलाइन भएकोले त्यसबाट पछाडि नहट्ने भन्दै विरोधसभामा महतोले भने, ‘सरकारले सकारात्मक वार्ता गर्न चाहेको छैन, निर्णायक वार्ता भनिएकै दिनहरुमा प्रहरीले मधेसमा आन्दोलनकारी मार्ने काम गरिरहेको छ ।’ ‘लामो समय पटक–पटक कार्यदलबाट भएको वार्ता निष्कर्षमा आउन नसकेपछि हिजो नेताहरुको शीर्ष तहमै वार्ता भयो,’ महतोले भने, ‘तर, शीर्ष तहमा वार्ता भनेर फेरि पुरानै कुरा दोहोर्याएर मधेशी जनतालाई चिढाउने काम मात्रै भएको छ ।’
मुलुकका मानवअधिकारकर्मीसमेत मौन बनेकोप्रति आक्रोश व्यक्त गर्दै उनले भने, ‘ प्रहरीबाट मधेशी समुदायको हत्या हुँदा काठमांडूका मानवअधिकारकर्मीहरु किन मौन छन् । मधेशमा भइरहेको मानवअधिकार उल्लंघनप्रति उनीहरुले किन आवाज उठाउन सकेका छैनन ।’

%d bloggers like this: