Saturday, December 15, 2018
Home > समाचार > एमाले अध्यक्ष  ओली मधेश झर्न पाएनन्

एमाले अध्यक्ष  ओली मधेश झर्न पाएनन्

Oli1
सञ्चारक
रङ्गेली(मोरङ), माघ ७ ।
युवा सङ्घको बहुप्रचारित तराई जागरण अभियानअन्तर्गत मोरङको पुरानो सदरमुकाम रङ्गेली बजारमा नेकपा एमालेका अध्यक्ष एवं प्रधानमन्त्री केपी शर्मा ओली नजाने भएका छन् । आन्दोलनरत मधेशीहरुले बुधबार गरेको सशक्त प्रदर्शन र रङ्गेलीमा हुने भनिएको सङ्घको कार्यक्रमलाई विथोल्ने चेतावनी दिएपछि प्रधानमन्त्री केपी शर्मा ओली विराटनगर नजाने भएका हुन् ।
युवा सङघले जारी तर कार्यान्वयन हुननसकेको संविधानका विशेषताहरुका बारेमा जनतालाई जागरुक बनाउने उद्देश्यले आयोजित जागरण अभियानमा पार्टी अध्यक्ष एवं प्रधानमन्त्री ओलीको सहभागिता रहने प्रचार जोडतोडका साथ गरेको थियो । वालुवाटार स्रोतले भने प्रधानमन्त्रीको रङ्गेली जाने कार्यक्रम तय नभएको बताउँदै आएको छ ।
मधेशीबाहुल्य क्षेत्र रङ्गेलीमा मधेश आन्दोलनको व्यापक प्रभाव रहँदैआएको छ । केही समययता सरकारविरोधी प्रदर्शनका कारण यस क्षेत्रका आन्दोलनकारीहरुलाई मोरङस्थित सरकारी सुरक्षाकर्मीहरुले पटपटक दमन गर्दैआएका छन् । बुधबार पनि शान्तिपूर्ण ढंगले भेलाजम्मा भएका प्रदर्शनकारीहरुमाथि प्रहरीले अन्धाधुन्ध लाठी प्रहार गरेका थिए ।
प्रधानमन्त्री ओली आउने र युवा सङ्घले मधेश आन्दोलनलाई चुनौति दिने गरी कार्यक्रम गर्ने तयारी गरेपछि बिच्किएका आन्दोलनकारीहरुले बुधबारबाट जारी रङ्गेली बजार बन्दलाई आज पनि निरन्तरता दिएका छन् ।
आन्दोलनकारीहरुले बजार तथा यातायात बन्द गराउनुका साथै ठाउँ ठाउँमा टायर बालेर प्रदर्शन गरिरहेका छन् ।
प्रदर्शनकारीहरुले कुनै पनि हालतमा कार्यक्रम गर्र्न नदिने भनेपछि युवा सङ्घले कार्यक्रम स्थल परिवर्तन गरेको छ । सङ्घको कार्यक्रम प्रहरी कार्यालयसँगै जोडिएको चउरमा सारिएको छ ।
आन्दोलनकारीहरुले कार्यक्रम नगर्न दिएको चेतावनीलाई अझ कडा बनाउन नेकपा एमालेनिकट दुईजनाको घरमा सामान्य तोडफोड समेत गरेका छन् । ती कार्यकर्ताहरुको घरमा कार्यक्रममा सहभागी हुन आउने सङ्घका नेता तथा कार्यकर्ताहरुका लागि सत्कार गर्ने तयारी गरिएको थियो ।
आन्दोलनरत पक्षले पनि आजका लागि नगर, क्षेत्र र गाउँमा जनसभा गर्ने कार्यक्रम सार्वजनिक गरेको थियो ।
कार्यक्रम गरेरै छाडने तयारीमा जुटेको सङ्घ र कार्यक्रम गर्न नदिने अडान लिएको आन्दोलनकारीहरुका कारण उत्पन्न हुनसक्ने तनावलाई दृष्टिगत गरी रङ्गेली क्षेत्रमा व्यापक सुरक्षाकर्मी परिचालन गरिएको छ ।

%d bloggers like this: