Saturday, December 15, 2018
Home > समाचार > धोका भन्दै मोर्चाले बहिष्कार गर्यो कार्यदलको बैठक

धोका भन्दै मोर्चाले बहिष्कार गर्यो कार्यदलको बैठक

Morchha adan

आशुतोष आनन्द सिँह

काठमाडौं, माघ ४ ।

संविधान संशोधनसम्बन्धी सरकारी विधेयकमा नाउँ मात्रको संशोधनसहित परिमार्जन गर्ने निचोडमा पुगिसकेका ठूला तीन दलका कारण सत्तारुढ दल, मुख्यप्रतिपक्षी काँग्रेस र संयुक्त लोकतान्त्रिक मधेशी मोर्चाका प्रतिनिधिहरु सम्मिलित कार्यदलको सोमबार साँझ भएको बैठक भाँडिएको छ ।

हिजो आफ्ना शीर्ष नेताहरुसँग परामर्श गरेर मोर्चाद्वारा प्रस्तुत संविधान संशोधनको कार्यविधिबारे आजको बैठकमा सहमति गर्ने निष्कर्षमा पुगेका तीनदलीय प्रतिनिधिहरुले सीमाङ्कन र नागरिकतासम्बन्धी संशोधनका विषयमा आलटाल गरेपछि बैठक विथोलिएको हो ।

प्रधानमन्त्री निवास वालुवाटारमा भएको सो बैठकमा कार्यदलका सदस्य एवं एमाले नेता भीम रावल र काँग्रेसका कार्यदल सदस्य महेश आचार्यले सीमाङ्नसम्बन्धी विषयमा मन्त्रिपरिषदले गरेको राजनीतिक संयन्त्र बनाई टुङ्गो लगाउने निर्णय र नागरिकताका बारेमा संविधानमा भएको सङ्घीय कानूनअनुसार हुने व्यवस्थाअनुरुप हुने गरी कार्यविधि बनाउने अडान लिएपछि मोर्चाका प्रतिनिधिहरुले बैठक बहिष्कार गरेका थिए । कार्यदलका सदस्य एवं तराई मधेश लोकतान्त्रिक पार्टीका सहअध्यक्ष रामनरेश रायले कार्यदलस्तरमा सहमति बनाउन तीन दल आनाकानी गरिरहेकाले कार्यदल औचित्य नरहेको र शीर्ष नेताहरुले नै विषयवस्तुलाई टुङ्गो लगाउने गरी आफूहरु बैठकबाट बाहिरिएको बताए । उनले तीन दलले फेरि पनि कार्यदलमार्फत उधारोमै सहमति गर्न खोजेकाले बैठकमा बस्नुको अर्थ नभएको जिकीर गरे ।

मोर्चाले शनिबार कार्यदलमा प्रस्तुत गरेको कार्यविधिमा राजनीतिक संयन्त्रले राज्यपुनर्संरचना तथा राज्यशक्ति बाँडफाँड समिति, राज्यपुनर्संरचना उच्चस्तरीय सुझाव आयोग तथा अन्य समितिमा प्रस्तुत गरिएका विभिन्न प्रतिवेदनहरुलाई आधार मान्दै तराई मधेशमा दुई प्रदेश हुने गरी प्रदेशहरुको सँख्या र सीमाङ्कन परिमार्जन गर्ने विषय र अन्तरिम संविधानअनुसार नै नागरिकतासम्बन्धी व्यवस्था हुनुपर्ने उल्लेख गरिएको थियो ।

वालुवाटारमा बैठक !

आजै सहमति हुने भनेर भ्रमछराइँ गरिरहेका सरकार र मुख्यप्रतिपक्षीहरुले नियोजित ढंगले कार्यदलको बैठक प्रधानमन्त्रीको सरकारी निवास वालुवाटरमा राखेका थिए । यसअघि कार्यदलस्तरको बैठक देशको मूल प्रशासनिक केन्द्र वालुवाटारमै हुँदैआएका थिए । सामान्यतया विषयवस्तु टुङ्गो लाग्ने बेलामा प्रधानमन्त्री निवासमा बैठक बस्ने प्रचलन रहँदैआएको छ । कार्यदल सदस्य रायले तीनदलका प्रतिनिधिहरुले घुमाउरो पारामा अहिलेकै सरकारी विधेयकलाई पारित गर्नुपर्ने अडान लिएपछि बैठक विथोलिएको बताए ।

शीर्ष नेताहरुबीचको वार्तामा अन्योल

कार्यदलस्तरको बैठकमा तीन दल फेरि पनि असहिष्णु र अनुदार भएर प्रस्तुत भएपछि सबै पक्षका शीर्ष नेताहरुका बीचमा वार्ता हुने कुरामा अन्योल उत्पन्न भएको छ । तीन दलका शीर्ष नेताहरुकै परामर्शमा कार्यदलका सदस्यहरुले आजको बैठकमा गैरजिम्मेवार र गम्भीरहीन भएर प्रस्तुत भएकाले तत्काल शीर्ष नेताहरुबीच बैठक हुने असम्भव बताइएको छ । स्वास्थ्योपचारका लागि तमलोपा अध्यक्ष महन्थ ठाकुर दिल्लीको मेदान्त अस्पतालमा भर्ना भएकोृ, सङ्घीय समाजवादी फोरमका अध्यक्ष उपेन्द्र यादव काठमाडौं बाहिर रहेको र सदभावना अध्यक्ष राजेन्द्र महतो मंगलबार एमाओवादी अध्यक्ष पुष्पकमल दाहाललाई बिहानै भेटेर सिरहाको लहान जाने कार्यक्रम रहेकाले तत्काल बैठक कठिन हुने बताइएको छ ।

%d bloggers like this: