Wednesday, August 22, 2018
Home > समाचार > सशस्त्र प्रहरीले यस्तो पनि गरे

सशस्त्र प्रहरीले यस्तो पनि गरे

road1
गोपाल बराल/
महोत्तरी, माघ ४ ।
मधेश आन्दोलनलाई दमन गर्न परिचालित भएपछि अलोकप्रिय बनेको बेला महोत्तरीको सीतापुर भङगहामा सशस्त्र प्रहरीले उदाहरणीय काम गरिरहेको छ । सशस्त्र प्रहरीको पहल र संलग्नतामा यस ठाउँमा एक किलोमीटरको दूरीमा कच्ची सडक मर्मत र ग्रेवल (ढुङ्गा ओछ्याउने) कार्य सुरुभएको छ ।
सीतापुर बजारबाट औरहीतर्फ जाने सडकको भुताहा खोलानजिकमा वर्षौंदेखि जर्जर रहँदैआएको एक किलोमीटर सडकलाई मर्मतसुधार गर्दै ग्रेवल गर्ने काम सशस्त्र प्रहरी बेस क्याम्प सीतापुरले सुरु गरेको हो । अत्यन्त चल्तीको सडक भए पनि पछिल्ला १० वर्षदेखि मर्मतसुधारको काम नहुँदा कहीं उड्ने धुलौटे माटो, कहीं खाल्डाखुल्डी र कहीं चैँ माटोको ढिस्को देखिने सो सडकमा गत माघ २ गतेबाट काम सुरु भएको छ ।
सशस्त्र प्रहरीको बेस क्याम्प र नेपाल प्रहरीको सीतापुर चौकीका अधिकृत एवं जवानहरुले मर्मतसम्भारको काम थालेपछि सहयोगी थपिदैँ गएको सशस्त्र प्रहरी बेसक्याम्प सीतापुरका सशस्त्र प्रहरी निरीक्षक जयबहादुर महतले जानकारी दिए ।

नेपाल प्रहरी र सशस्त्र प्रहरीले काम थालेपछि आफ्नो कम्पनीको काममा सो बाटो बाक्लै प्रयोग गर्दै आएको रमण कन्ट्रक्सनका अशोक मण्डलले माटो खन्ने र सम्याउने जेसीभी मेसिन एक साताका लागि निशुल्क उपलब्ध गराएका छन् । यसैबीच भङ्गाहा गाविसका सचिब प्रमोदकुमार यादवलगायतका अन्य गाउँघरका बासिन्दाले सडक मर्मतसम्भारमा चासो देखाएपछि अब एक किलोमीटर दूरीमा ढुङ्गा ओछ्याउन नै सकिने भएको सशस्त्र प्रहरी निरीक्षक महतले बताए ।

आफ्नो गाउँबस्तीमा केही समयको सेवाका लागि आएका सशस्त्र प्रहरी र नेपाल प्रहरीले रचनात्मक काममा हात हालेपछि यहाँका बासिन्दा थप काम गर्न हौसिएका छन् । अब सडक मर्मतसम्भार र ग्रेवल गरिने कार्यमा जनसहभागिता बढाउन स्थानीय राजनीतिक दल, सामाजिक सङ्घसंस्था र नागरिक समाजका प्रतिनिधिले पहलकदमी गरेको भङ्गाहा—३ का सामाजिक कार्यकर्ता २२ वर्षीय युवा रामईश्वर ठाकुरले जानकारी दिए ।
सहयोग र जनसहभागिताबाट सुरुभएको यो कामको लागत करिब १० लाख हुने जिविस महोत्तरीका प्राविधिक अरुणकुमार झाको भनाइ छ ।

Leave a Reply

Your email address will not be published. Required fields are marked *

%d bloggers like this: