Saturday, December 15, 2018
Home > समाचार > एआइआइबी को महत्वपूर्ण सञ्चालक समितिमा नेपाल मनोनित

एआइआइबी को महत्वपूर्ण सञ्चालक समितिमा नेपाल मनोनित

आशुतोष आनन्द सिंह ,माघ ३ । चीनको नेतृत्वमा शनिबारमात्रै स्थापना भएको एसियाली पूर्वाधार लगानी बैंक एआइआइबी को महत्वपूर्ण सञ्चालक समितिमा नेपाल पनि चुनिएको छ।
उक्त बैंकको सञ्चालक समितिमा एसियाका ९ र बाहिरका दुईवटा देश छानिंदा नेपालपनि मनोनित  भएको हो।
अर्थमन्त्री विष्णु पौडेल नेतृत्वको टोलीले बेइजिंगमा एआइआइबीको उद्घाटन कार्यक्रममा भाग लिएको छ।
संस्थापक सदस्य नेपालले उक्त समितिमा रहंदा आफूलाई आवश्यक सहयोग पाउन सहज हुने विश्वास लिएको देखिन्छ।

नेपालले भूकम्पपछिको पुनर्निर्माण र राष्ट्रिय गौरवको आयोजनामा सघाउ पुग्ने खालका लगानीका निम्ति एआइआइबीमा प्रस्ताव राख्ने सरकारको तयारी छ।
अमेरिकी वर्चस्वको विश्व बैंकको प्रतिद्वन्द्वीको रुपमा हेरिएको उक्त ब्याङ्कले एसियाली मुलुकहरुको पूर्वाधार विकासमा सहयोग गर्ने उद्देश्य लिएको छ।
पूर्वाधार, उर्जा, यातायात, जलस्रोत जस्ता क्षेत्रमा लगानी गर्ने उद्देश्य लिएको उक्त बैंकले कम विकसित देशहरुमा सेवा केन्द्रित गर्ने जनाएको छ।

भूकम्पले अस्तव्यस्त भएको नेपाल सञ्चालक समितिमा छानिएपछि प्रस्तावहरु पारित गराउन थप सजिलो हुने भन्दै अर्थ राज्यमन्त्री दामोदर भण्डारीले भने, सञ्चालक समितिमा भएपछि स्वाभाविक रुपमा नेपालले त्यहां आफ्नो प्रस्तावहरुलाई सहज ढंगले राख्न सक्छ। हामी नेपालको अर्थतन्त्रमा दूरगामी असर पार्न सक्ने खालका विषयमा प्रस्ताव राख्नेछौं।
पहल
शनिबारको उद्घाटन समारोहमा नै नेपालले भूकम्पपछिको पुनर्निर्माण सम्बन्धी प्रस्ताव लिएर जाने तयारी गरेको थियो।
तर उद्घाटनको बेला नै प्रस्ताव राख्दा हतारो हुने देखिएको भन्दै अर्थ राज्यमन्त्री भण्डारीले अब छिट्टै नै प्रस्ताव राखिने जनाए।
उनका अनुसार, पुनर्निर्माणका अतिरिक्त मध्यपहाडी लोकमार्ग जस्ता राष्ट्रिय गौरव र हालै प्रधानमन्त्रीले प्राथमिकता साथ औंल्याएको महत्वाकांक्षी सौर्य उर्जा उत्पादनका निम्ति प्रस्ताव गरिनेछ।
तर ऋणको ब्याजदर अरु बैंकभन्दा कम हुन्छ कि हुन्न भन्ने स्पष्ट भइसकेको छैन।
अर्थ मन्त्रालयका सचिव लोकदर्शन रेग्मी भन्छन्,विश्व बैंक र एसियाली विकास बैंकको मापदण्ड फरक फरक छन्। अहिले यति नै ब्याज हो भन्ने यकीन भइसकेको छैन। तर ब्याज प्रतिस्पर्धी नै होला।
विश्व बैंक र एसियाली विकास बैंकको प्रतिद्वन्द्वी संस्थाको रुपमा चीनको विशेष पहलमा खोलिएको भनिएको उक्त बैंकको अधिकृत पूंजी एक सय अर्ब अमेरिकी डलर रहेको चिनियां समाचार संस्था सिन्ह्वाले जनाएको छ।
एसियाली मुलुक जापान र विश्व शक्ति अमेरिका भने उक्त बैंकको सदस्य छैनन्।

%d bloggers like this: