Sunday, February 18, 2018
Home > समाचार > अनुसन्धानको नाममा निर्दोष व्यक्तिहरुको धरपक्कड :मधेशी मोर्चा सप्तरी

अनुसन्धानको नाममा निर्दोष व्यक्तिहरुको धरपक्कड :मधेशी मोर्चा सप्तरी

राजविराज, २ माघ । अनुसन्धानको नाममा निर्दोष व्यक्तिहरुको धरपक्कड तथा मानसिक यातना दिने काम भईरहेको भन्दै मधेशी मोर्चा सप्तरीले त्यस्ता कार्य तत्काल रोक्न स्थानीय प्रशासनको ध्यानार्षण गराएको छ ।

मोर्चाको तर्फबाट सूचना तथा सञ्चार समितिका संयोजक अमरनाथ मण्डल र सदस्य श्यामसुन्दर यादवले शनिवार प्रेस विज्ञप्ति जारी गर्दै स्थानीय प्रशासनको ध्यानाकर्षण गराएका हुन् । पछिल्लो समय गत पुस २० गते सप्तरीको झुटकी प्रहरी चौकीमा कार्यरत सई रमेश सुब्बालाई गोली हानी हत्या गरिएको घटनाप्रति संयुक्त लोकतान्त्रिक मधेशी मोर्चा सप्तरी समेत दुःख व्यक्त गर्दै उक्त घटनाको विषयमा सत्यतथ्य छानबिन गरी दोषीलाई कडा कार्वाही हुनुपर्नेमा मोर्चाको विमती नरहेको विज्ञप्तिमा उल्लेख छ ।
कुनै पनि अपराधिक घटनाको अनुसन्धान गर्नु र दोषीलाई कानूनको दायरमा ल्याउनु सुरक्षा निकायको जिम्मेवारी भएको भन्दै प्रेसविज्ञप्तिमा अगाडि भनिएको छ ‘उक्त कार्यमा मोर्चाको बाधा विरोध नरहेकोले छानबिन तथा अनुसन्धान कार्य गर्दा अपराधी नउम्कियोस् र निर्दोष सर्वसाधारण जनतालाई अनावश्यक रुपमा दुःख दिने कार्य नहोस्, यसतर्फ स्थानीय प्रशासनको ध्यानाकर्षण गराउन चाहन्छौं ।’
केही समय यता अनुसन्धान र अपराध नियन्त्रणको नाममा निर्दोष व्यक्तिहरुलाई धडपकड गर्ने, खानतलासीको नाममा घर–घरमा प्रवेश गरी सर्वसाधारणलाई आतंकित पार्ने, शारीरिक तथा मानसिक यातना दिने र मधेश आन्दोलनमा लागेका आन्दोलनकारीहरुलाई पूर्वाग्रही ढङ्गले हिरासतमा राखी झुठा मुद्दा लगाई फँसाउने र यातना दिने कार्य भइरहेकोप्रति मोर्चाले प्रेस विज्ञप्ति मार्फत सचेत गराएको छ । शान्तिपूर्ण आन्दोलनमा लागेका हाम्रा सहकर्मीहरुको मनोबल गिराउन तथा निरुत्साहित पार्न विभिन्न खालका षडयन्त्रहरु भइरहेकोले त्यस्ता गतिविधी तत्काल बन्द गर्न समेत प्रेस विज्ञप्तिमार्फत सम्बन्धित पक्षसँग आग्रह गर्दै प्रेस विज्ञप्तिमा अगाडि भनिएको छ ‘यस्ता गतिविधिहरु नरोकिए त्यस्ता क्रियाकलाप विरुद्ध मोर्चा थप सशक्त सशक्त आन्दोलन गर्न बाध्य हुनेछ ।’
संयुक्त लोकतान्त्रिक मधेशी मोर्चाले आह्वान गरेको निरन्तरको संघर्षका कार्यक्रमलाई पूर्ण रुपमा सफल एवम् सशक्त बनाउन मधेशी मोर्चा सप्तरी प्रतिवद्ध रहेको जनाइएको छ । शान्तिपूर्ण आन्दोलनबाटै मधेशी जनताको हक अधिकारलाई सुनिश्चित गराउने संकल्पका साथ अघि बढिरहेको आन्दोलनलाई मत्थर पार्न केही मधेश विरोधी तत्वहरु सक्रिय रहेकोप्रति मोर्चा सचेत रहेको विज्ञप्तिमा उल्लेख छ ।
शान्तिपूर्ण आन्दोलनका क्रममा राज्यद्वारा निरन्तर रुपमा गरिएको क्रुर दमनका क्रममा हालसम्म हामीले ६ जना योद्धाहरुलाई गुमाउनुपरेको, करिब पाँच दर्जन भन्दा बढी घाइते तथा करिब आधा दर्जन आन्दोलनकारी अङ्गभङ्ग भएको पीडालाई आत्मसात गर्दै शान्तिपूर्ण सशक्त संघर्ष जारी नै रहेको विज्ञप्तिमा जनाइएको छ । अधिकार प्राप्त नभएसम्म शान्तिपूर्ण संघर्ष जारी रहने प्रतिवद्धता

दोहो-याउँदै विज्ञप्तिमा अगाडि भनिएको छ ‘राज्यद्वारा भइरहेको क्रुर दमनको वास्ता नगरी जारी शान्तिपूर्ण आन्दोलनका हाम्रा आन्दोलनकारी सहयोद्धाहरु अगाडि बढीरहेको अवस्थामा केही परिचालित कुतत्वहरु सक्रिय रहेकोले त्यस्ता तत्वहरुबाट समेत रहन हाम्रो आग्रह छ ।’
मधेशी मोर्चा सप्तरीका संयोजक कपिलदेव यादवको अध्यक्षतामा शनिबार बसेको बैठकले स्थानीय प्रशासनलाई ध्यानाकर्षण र सचेत गराउने निर्णय समेत गरेको जनाईएको छ ।

Leave a Reply

Your email address will not be published. Required fields are marked *

%d bloggers like this: