Wednesday, August 22, 2018
Home > समाचार > मधेशका विकास अड्डामा ब्रह्मलुट

मधेशका विकास अड्डामा ब्रह्मलुट

dhanusha map1
बीरेन्द्र रमण
जनकपुर, माघ १ ।

मधेशका विकास अड्डाहरुमा ब्रह्मलुट भइरहेको छ । विकास निर्माणका योजनाहरु परदर्शी नहुने र आफन्तमार्फत् योजना कार्यान्वयनको प्रयासले गर्दा धनुषा जिल्लामा मात्र गत आर्थिक वर्षमा ६६ करोड रुपियाँ फ्रीज भएको थियो । दलहरुले आफ्ना कार्यकर्तालाई बाँडेका विकासनिर्माणलगायतका योजनाहरु समयमा पुरा नभएपछि सो रकम फ्रीज भएको हो ।
जिल्लाका अधिकांश विकास निर्माणसम्बद्ध कार्यालयहरुमा राजनीतिक दलहरुको हालीमुहाली चल्दैआएको छ । जिल्ला विकास समितिको कार्यालयमा भने योजना निर्माणदेखि लिएर कार्यान्वयनसम्मका सम्पूर्ण प्रक्रियामा तीब्र तथा सघन दलीय हस्तक्षेप रहँदैआएको छ । दलहरुको मनोमानी र आलटालका कारण योजनाले पूर्णता नपाउने तथा कमसल निर्माण कार्यबाट बजेटको दुरुपयोग हुने गरेको छ ।
दलहरुले घुमाउरो पारामा जिविसको बजेट कुम्ल्याउने गरेको उदाहरण बनेको छ नेकपा एमाले धनुषाको कार्यालय भवन निर्माण । सो पार्टीले मिथिला भवन र गेट निर्माणको नाउँमा छ लाख रुपियाँ निकासा लिएर पार्टी कार्यालयको निर्माण कार्य गरेको छ । उक्त रकमबाट पार्टी कार्यालय परिसरमा व्यावसायिक प्रयोजनका कोठाहरु थपिएका छन् । सो पार्टीले निर्माण गरेको मिथिला गेटका लागि भने जिविसबाट प्राप्त भएको रकमको उपयोग नभएर विभिन्न व्यक्ति तथा संस्थाबाट प्राप्त चन्दा रकम प्रयोग गरिएको छ ।

पहुँच र हैसियतअनुसार दलका स्थानीय नेताहरुले विकासनिर्माणका लागि रकम लिने र त्यसको दुरुपयोग गर्ने प्रबृत्ति बढ्दो छ । जसले गर्दा कागजमा थुप्रा योजनाहरु सम्पन्न भएको देखिए पनि ती योजनाहरु कतै पनि देखिँदैनन् । जिल्लामा आउने स्थानीय विकास अधिकारीहरुलाई चङ्गुलमा फसाएर स्थानीय नेताहरुले योजना आफ्नो हातमा पार्ने गरेकाले जिल्लाको विकास निर्माण ठप्प रहँदैआएको गुनासो धनुषाबासीहरुको छ ।
कोष तथा लेखा नियन्त्रक कार्यालय धनुषाका अनुसार तराईका जिल्लाहरुमध्ये सुगम मानिएको धनुषा जिल्लामा आर्थिक वर्ष २०७१।०७२ मा पुँजिगततर्फ ७२ प्रतिशत बजेट मात्र खर्च हुन सकेको छ । विकास निर्माणका जिम्मा पाएका स्थानीय निकायहरुका बीचमा समन्वय हुन नसकेर पनि बजेट फ्रीज भएको हो । कोष तथा लेखा नियन्त्रणक कार्यालय धनुषाका प्रमुख दामोदर थापाले विकास अड्डाहरुका योजनालाई ठेकेदारहरुले निकै कममा ठेक्का स्वीकार गर्ने र उनीहरुले समयमा काम नगर्ने परिपाटीका कारण समस्या आउने गरेको बताउनुभयो ।
धनुषामा आर्थिक वर्ष २०७१।०७२ मा जम्मा ६ अर्ब ९३ करोड रुपियाँ कुल बजेट रहेको थियो । जसमा पँुजिगततर्फ २ अर्ब ९३ करोड भने चालु तर्फ ४ अर्ब ५४ करोड रुपियाँ थियो । जसमध्ये खर्चमा पँुजिगत तर्फ १ अर्ब ७३ करोड भने चालु तर्फ ४ अर्ब २१ करोड रुपियाँ खर्च भएको छ ।

Leave a Reply

Your email address will not be published. Required fields are marked *

%d bloggers like this: