Tuesday, November 13, 2018
Home > समाचार > भारतीय रुपियाँको यसरी तस्करी हुँदैछ

भारतीय रुपियाँको यसरी तस्करी हुँदैछ

ATM
सञ्जीवबिक्रम शाह
सप्तरी, माघ १ ।
मधेश आन्दोलको मौका छोपेर सप्तरीसहित मधेशका जिल्लाहरुमा भारतीय रुपियाँको अवैध कारोबार बढेको छ । निजामती कर्मचारीदेखि लिएर आन्दोलनरत नेता तथा कार्यकर्ताका साथै अन्य क्षेत्रका व्यक्तिहरुसमेतले भारतीय रुपियाँको अवैध ओसारपोसार र सटहीबाट कमाइरहेका छन् ।
कृषि विकास कार्यालयमा काम गरिरहेका एकजना कर्मचारीले भारतीय रुपियाँको सटही गरेर दैनिक २० हजार रुपियाँसम्म कमाउने गरेका छन् । त्यस्तै स्थानीय एक गैरसरकारी संस्थाका अध्यक्षले संस्थाकै खाता प्रयोग गरी भारतीय रुपियाँको कारोबार गरेर दिनको १२ देखि १५ हजार रुपियाँ आम्दानी गरिरहेका छन् ।
राष्ट्र बैंकले तोकेको विनिमय दरअनुसार भारतीय रुपियाँ एक सयको नेपाली रुपैयाँ एक सय साठी भए पनि सीमावर्ती भारतीय बजारहरुमा नेपाली रुपियाँ एक सय सत्तरीले मात्र भारतीय रुपियाँ एक सयको मान्यता पाउने गरेकोले भारतीय रुपियाँको अवैध कारोबारका लागि बाटो खुलेको हो ।
मधेश आन्दोलन हुनुभन्दा अघि सप्तरी र सुनसरीको सीमानाका नजिकका भारतीय बजारहरुमा नेपाली रुपियाँ लिएर सरसामान खरिद गर्न जाँदा सयमा ३ रुपियाँदेखि पाँच रुपियाँसम्म बट्टा(कमीसन) लिने गरिएको थियो । तर अहिले बट्टाको रकममा वृद्धि भएर सयमा ८ देखि १० रुपियाँसम्म लिन थालिएको छ ।
नेपाली भिसा कार्ड एटीएमबाट भारतीय रुपियाँ १० हजारसम्म निकाल्न सकिने सुविधालाई उपयोग गरी धेरैओटा एटीएमबाट भारतीय रकम संकलन गरी चर्को कमीसन लिएर सटही गर्ने अवैध धन्दा चलाउनेहरुले विभिन्न व्यक्तिका एटीएमवापत दिनको सय रुपियाँ दिने गरेका छन् । भारतीय बैकबाट रुपियाँ निकाल्ने बित्तिकै भारतीय व्यपारीहरु नै सयमा नौ रुपियाँ थपेर लिन हतारिने गरेकाले यो व्यवसाय फस्टाउँदै गएको जानकारहरु बताउँछन् । सीमावर्ती भारतीय बजारका कतिपय भारतीय व्यापारीहरुले आफ्नै वा नेपाली नातेदारका नाउँमा नेपालस्थित बैंकहरुमा खाता सञ्चालन गरेका छन् । ती खातामा नेपाली रुपियाँ जम्मा गरेर भारतीय बैंकहरुबाट एटीएममार्फत् भारतीय रुपियाँ निकालेर भारतीय रुपियाँको कारोबार गरिरहेका छन् । खाताधारीहरुलाई उनीहरुले बोनस रकम दिने गरेका छन् ।
भारतीय रुपियाँको अवैध सटहीमा प्रतिष्ठित भनाउँदाहरुको पनि संलग्नता रहेको र उनीहरुले सतर्कतापूर्वक यसको कारोबार सञ्चालन गरिरहेको भारु सटही गर्ने सियाराम साह बताउँछन् । अहिले सप्तरीमा मात्रै दैनिक एक करोड भारतीय रुपियाँको सटही कारोबार भइरहेको छ । आन्दोलनका दौरान बैंकहरुमा खाताधारीहरु बढेको र थपिएका अधिकांश खाताबाट यस्तै कारोबार भइरहेको एकजना स्थानीय बैंककर्मीले बताए । उनले भने, “आज नेपाली रुपियाँ जम्मा गर्ने र भोलि नै भारतीय सहरहरुमा गएर निकाल्ने क्रम बढेको छ ।”
मधेशी मोर्चाले अहिले राजविराजका बैंकहरु हप्ताको एक दिन सोमबार खोल्न दिएको छ । सोमबार बैंकहरुमा बढ्ने भिडमध्ये ९० प्रतिशत भारु कारोबारीहरु भएको बैंकहरुको भनाइ छ । स्थानीय बैंकहरुले न्यूनतम विनिमय शुल्क लिएर भारतीय रुपियाँ दिने सेवा अहिले बन्द गरेका छन् ।

%d bloggers like this: