सञ्चारक, माघ १ ।
भारतको राजधानी नयाँ दिल्लीमा राजनीतिक भेटघाटमा व्यस्त सदभावना पार्टीका अध्यक्ष राजेन्द्र महतोले बल प्रयोग गरेर नाका खोल्न लगाए सम्पूर्ण मधेश नै भारतविरुद्ध जानसक्ने सुझाएका छन् ।
उनले मधेशीहरुले अधिकार प्राप्त नगर्दासम्म सीमानाकामा धर्ना बसेकाहरुलाई उठाउन कुनै पनि किसिमको बल प्रयोग नगर्न भारतीय अधिकारीहरुलाई आग्रह गरे । अध्यक्ष महतोले पहाडका केही वर्ग विशेष र नेपालीभाषी सञ्चारमाध्यमहरुले मात्र नेपालमा भारतविरोधी माहौल बनाएको भन्दै अध्यक्ष महतोले मधेश आन्दोलनलाई असर पर्ने गरी कुनै पनि कदम उठाए मधेशी जनता पनि भारतका विरुद्ध लाग्नसक्ने चेतावनी दिए ।
भारतीय विदेश मन्त्री सुषमा स्वराज, प्रधानमन्त्री नरेन्द्र मोदीका सुरक्षा सल्लाहकार अजित डोभाललगायतका नेता एवं अधिकारीहरुसँगको भेटमा महतोले भारत र मधेशबीच जनस्तरसम्मको सम्बन्ध र खुला सीमा रहेको औंल्याउँदै रोटीबेटीको यस्तो सम्बन्ध नै प्रभावित नहुने गरी नाकाबन्दीका बारेमा निर्णय लिन भारतीय पक्षलाई सचेत गराए ।
पार्टीको अधिकारिक फेसबुक एकाउन्टमा पोष्ट गरिएको समाचारअनुसार नाका खोल्ने पक्षमा पुगिसकेको भारतले महतोको सुझावपछि आफ्नो नीतिमा परिवर्तन ल्याएको छ । अध्यक्ष महतोले भारतका सरकार, सत्तारुढ दल र विपक्षी नेताहरुसँग कुराकानी गरेका थिए ।
