Saturday, December 15, 2018
Home > Uncategorized > दिल्लीबाट राजेन्द्र महतोले भने– संविधान संशोधनलाई मान्दैनौं

दिल्लीबाट राजेन्द्र महतोले भने– संविधान संशोधनलाई मान्दैनौं

RAJENDRA MAHATO1
सञ्चारक पुस २७ ।
सदभावना पार्टीका अध्यक्ष राजेन्द्र महतोले संविधान संशोधनको प्रक्रियालाई आफूहरुले स्वीकार नगर्ने बताउनुभएको छ । सरकार, प्रतिपक्षी काँग्रेस र संयुक्त लोकतान्त्रिक मधेशी मोर्चाका कार्यदलबीच भइरहेको छलफल सकारात्मक तथा सार्थक भइरहेको अनुमान गरिएको बेला मोर्चाका एउटा घटक सदभावना अध्यक्ष महतोको यस्तो भनाइ आएको हो । सदभावना अध्यक्ष महतोमाथि विराटनगर नाकामा केही दिनअघि प्रहरीले सांघातिक आक्रमण गरेपछि सो पार्टीले सरकारले माफी माग्नु पर्दै कार्यदलमा सहभागिता जनाउन छोडेको छ ।
मधेशी पत्रकार समाजले सोमबार काठमाडौंमा गरेको अन्तक्र्रियामा नयाँ दिल्लीबाट टेलफोन सम्वादमा अध्यक्ष महतोले आफू केही सातापछि नेपाल फर्केर फेरि पनि नाका बस्ने र त्यसका लागि काठमाडौं रहेका मधेशी मोर्चाका अन्य शीर्ष नेताहरुलाई पनि बोलाउने बताउनुभयो । सदभावना अध्यक्ष महतो प्रहरीको आक्रमणमा परी घाइते भएपछि थप उपचारका लागि दिल्ली पुग्नुभएको थियो । स्वास्थ्योपचारपछि तङ्ग्रिनुभएका अध्यक्ष महतो अहिले दिल्लीमै भारतीय नेताहरुसँग मधेश आन्दोलनका बारेमा परामर्श गरिरहनुभएको छ ।
टेलिफोन संवादमा अध्यक्ष महतोले सरकारले वर्ताको नाटक मात्र गरिरहेको आरोप लगाउँदै अब मधेशी जनताले उधारोमा नभएर नगदमा कारोबार गर्ने दोहर्याउनुभयो । भारतीय नेताहरुले मधेश आन्दोलनको निकासका लागि प्रधानमन्त्री ओलीलाई सुझाव दिइरहेको जानकारी गराउँदै उहाँले मधेश आन्दोलनलाई दिल्लीको आन्दोलन बताउनेहरु अबका केही दिनमा भारतीय दरबारमा लम्पसार पर्न आइरहेको व्यङ्ग्य गर्नुभयो । उहाँले प्रधानमन्त्री केपी ओलीकोे सम्भावित दिल्ली भ्रमणलाई लक्षित गर्दै भन्नुभयो,–‘भारतपरस्त को हुन् भन्ने कुरा अब प्रष्ट हुनेछ ।’ मधेशीहरुले आफ्नो अधिकार माग्दा भारतीय हेर्ने नजर परिवर्तन हुनुपर्ने पनि उहाँले औंल्याउनुभयो ।
उहाँले मधेशका मागहरु पुरा नहुञ्जेलसम्म नाका नखुल्ने दाबी पनि गर्नुभयो ।
अध्यक्ष महतोले वर्तमान सरकारलाई उल्लुहरुको झुण्ड भएको संज्ञा दिँदै उल्लुहरुको झुण्डले मधेशमा पाँच महिनाबाट भइरहेको आन्दोलनलाई नदेखेकोमा दुःख व्यक्त गर्नुभयो । उहाँले मधेश कसैको उपनिवेश नभएको ओली सरकारले बुझनुपर्ने पनि उल्लेख गर्नुभयो ।
कार्यक्रम समाजका अध्यक्ष मोहन सिँहको सभापतित्वमा सम्पन्न भएको थियो ।

%d bloggers like this: