Tuesday, November 20, 2018
Home > कृषि/वन/वातावरण > महोत्तरीमा बाँदर आतङ्क

महोत्तरीमा बाँदर आतङ्क

घरघरै पस्न थाले हुलका हुल बाँदर
स्थानीयबासीहरु वाक्कदिक्क
बाँदरको झम्टाइबाट कयौं घाइते पनि भए
वन विनासले बाँदर बस्ती पसेको विज्ञको भनाइ
बाँदरसँग सामान्य व्यवहार गर्न वन अधिकृत चन्देश्वर यादवको आग्रह
बस्तीमा बँदेल पनि पसे
देखिन थाले नील गाई पनि

monkey
गोपाल बराल / वर्दिबास, २७ पुस ।
महोत्तरी जिल्लाको उत्तरवर्तीे वर्दिबास नगरपालिका र आसपासका ग्रामीण क्षेत्रका बासिन्दा बाँदर (बानर) आतङ्कले आजित भएका छन् । वर्दिबास नगरपालिकाको गौरीडाँडा, पाटु, कालापानी, राजाबास, पर्साहीधाप, माइस्थान, टुटेश्वर, गडन्ता , वरडाँडा र चेरुलगायतका बस्ती र छिमेकका हाथीलेट, खयरमारा, बेलगाछी र लक्ष्मीनिंया गाविसका बस्तीमा घरघरै हुलका हुल बाँदर पसेर खानेकुरा, अन्नपात र अन्य सामान नोक्सान गर्न थालेपछि यहाँका बासिन्दा वाक्कदिक्क भएका हुन् ।
वर्दिबास नपा क्षेत्रकै नेवारडाँडा र कामीडाँडा सामुमायिक वनबाट गाउँबस्ती पस्ने गरेका बाँदरले थाङ्रामा राखेका मकैका झुत्ता उधिनेर दिनहुँ दुःख दिने गरेको वर्दिबास–४ गौरीडाँडाकी गृहिणी गीता खतिवडाको गुनासो छ । आफ्नो बस्तीका घरघरै पस्न थालेको बाँदरले मान्छेका आँखा छलेर भान्साबाटै पनि खानेकुरा लिएर भाग्ने गरेको सोही बस्तीकी यशोदा बस्नेतले बताउनुभयो ।

घरघरैे हुलमै पस्न लागेका बाँदरले उसलाई समान नष्ट गर्नबाट रोक्न खोज्दा आक्रमण नै गर्ने गरेको पीडितहरुको भनाइ छ । आफ्नो बस्तीमा बाँदरको झम्टाइमा परेर ससाना नानीहरु मात्र नभई कामकाजी महिला र बटुवाहरुसमेत तर्सन र घाइतेसमेत हुने गरेका वर्दिबास–६ राजाबासका सामाजिक कार्यकर्ता रामबहादुर थापाले बताउनुभयो । वर्दिबाससँगै जोडिएका खयरमारा, लक्ष्मीनिंयाँ, बेलगाछी र हाथीलेट गाविसका बस्तीहरु र गौशाला नगरपालिकाको रामनगर बस्तीमा घरघरै मचान उधिन्न पुग्ने बाँदरको हुलले आफूहरु हैरान भएको त्यहाँका बासिन्दाले बताएका छन् ।

पछिल्लो पटक त वनक्षेत्रबाट १० किलोमीटर दुरीको वर्दिबाससँगै सीमा जोडिएको पशुपतिनगर गाविसमा बँदेल पसेर हैरान बनाएको पशुपतिनगर–१ का किसान महेन्द्रसिंह कुशवाहाले बताउनुभयो । आफ्नो बस्ती पसेका तीन÷चार वटा बँदेलले तरकारी खेती सखाप पारिदिएको कुशवाहासहित अन्य किसानको गुनासो छ । लामो समयदेखि बस्ती नजिकैको वनक्षेत्रमा रहँदै बस्दै आएका बाँदर आफ्नो बासस्थान वरिपरि वन विनास हुन थालेर भोजनको अभाव हुन थालेपछि बस्ती पस्न थालेको जिल्ला वन कार्यालय महोत्तरीका विज्ञहरुको ठहर छ । वनमा खानेकुराको अभाव भएपछि मान्छेसँग पहिलेदेखि नै मज्जाले रत्तिदै आएका बाँदर खानाको खोजीमा गाउँ पस्न लागेको जिल्ला वन कार्यालय महोत्तरीका सहायक वन अधिकृत चन्देश्वर यादवले बताउनुभयो ।बँदेल भने भित्री जङ्गलमा बस्नेभए पनि पछिल्लो पटक शिकारीको दपेटाइले भाग्दै गाउँ पसेको हुनसक्ने हाल ईलाका वन कार्यालय वर्दिबासका प्रमुख रहनुभएका सहायक वन अधिकृत यादवको भनाइ छ ।

कार्यालयले बस्ती पसेका बाँदर र अन्य वन्यजन्तुसँग सामान्य र सहज व्यवहार गर्न आग्रह गरेको छ । बाँदरलाई हिर्काउँदा, जिस्क्याउँदा र लखेट्न खोज्दा उ झन् छुच्चो हुने हुँदा त्यस्तो व्यवहार नगर्न विज्ञले आग्रह गरेका छन् । यता स्थानीय बासिन्दाले भने बँदेल र बाँदरबाट हुने क्षति तत्काल रोक्न आवश्यक तयारी र सुरक्षाको प्रभावकारी कार्यक्रम अवलम्बन गर्न सम्बन्धित पक्षको ध्यानाकर्षण गराएका छन् । महोत्तरीका गाउँनगर बस्तीमा नीलगाई पनि देखिने गरेका छन् ।

%d bloggers like this: