Tuesday, December 11, 2018
Home > विचार/अन्तर्वार्ता > गच्छदार देशका एक मात्र नेता हुन् : अरगरिया

गच्छदार देशका एक मात्र नेता हुन् : अरगरिया

Uma shankar photo

उमाशंकर अरगरिया । मधेशी जनअधिकार फोरम नेपाल(लोकतान्त्रिक) का केन्द्रीय सदस्य एवं धनुषा जिल्ला अध्यक्ष । पार्टीभित्र चर्को तर प्रखर स्वरका कारण लोकप्रियतासँगै निकै आलोचनासमेत खप्नुपरेको छ उहाँलाई । पार्टी अध्यक्ष विजयकुमार गच्छदारसँग निकट मानिने अरगरियासँग सञ्चारकले मधेश आन्दोलनमा केन्द्रित भएर कुराकानी गरेको छ । प्रस्तुत छ, कुराकानीको सारसंक्षेप ।

तपाईंहरु त हिजोआज मधेशका लागि प्रतिगामी कित्तामा पो उभिनु भएको छ ?

हामी मधेश आन्दोलनबाट विचलित वा विमुख भएका छैनौं । बरु थप सशक्त र रणनीतिक तरिकाले स डक, सदन र सरकारमा बसेर आन्दोलनलार्ई परिणाममुखी तथा सार्थक निष्कर्षमा पुर्याउने कामलाई निरन्तरता दिदैछौं । यसको उदाहरण नै भनौं हामी सत्तारुढ हुनुपूर्व मधेशी, थारुलगायतका जनजाति, आदिबासी, दलित आदि सीमान्तकृत समुदायलाई अधिकारसम्पन्न बनाउन आठबुँदे सम्झौता गरेर अघि बढेका हौं । आठबुँदेलाई यथाशिघ्र कार्यान्वयनका लागि हाम्रा आदरणीय अध्यक्ष विजयकुमार गच्छदारज्यूको नेतृत्वमा पार्टी पदाधिकारीहरुको उच्चस्तरीय टोलीले नै प्रधानमन्त्री केपी ओलीलाई भेटेर स्मरणपत्र बुझाएको तपाईंलाई अवगत नै छ होला । हेर्नुस यथार्थ के छ भने देशका शासकहरु वर्षौदेखि मधेश र मधेशी जनताका अधिकारप्रति असहिष्णु रहँदैआएको छ । मधेशीप्रतिकै उत्पीडन, विभेद र अन्यायका कारणले नै मुलुकको मूलाधारका राजनीतिमा स्थापित व्यक्तित्व आदरणीय अध्यक्ष गच्छदारज्यूले मधेश मुक्तिसङ्ग्राममा छुट्टै पार्टीमा आबद्ध भएर अधिकारप्राप्तिको आन्दोलनमा उत्रिनु भयो । तपाईंले भनेजस्तै सरकार प्राथमिक विषय होइन । तर सरकारमा बसेर आन्दोलनलाई उत्कर्ष र उचाइँमा पुर्याउने काम पनि त चानचुने होइन नि । तपाईंलाई थाहा होला, आज मधेशी र थारुहरुको आन्दोलनमा धेरैले शहादत प्राप्त गरेका छन्, हजारौंं घाइते भएका छन् र धेरैलाई बिनाकारण मुद्दा लगाइएको छ । हामी सरकारमा रहँदा कम्तीमा वीरगति प्राप्त गरेकाहरुलाई क्षतिपूर्ति दिलाउने, घाइतेहरुको उपचारको व्यवस्था सरकारले गर्ने र निर्दोष व्यक्तिहरुलाई बिनाकारण लगाइएको मुद्दा फिर्ता गराउने प्रक्रिया सुरु गराएका छौं । त्यति मात्र होइन,  अहिले मधेशका महत्वपूर्ण दुईओटा मागलाई संशोधन विद्येयक मार्फत् अगाडि ल्याउने काम भइरहेको छ । जसको निर्णायक स्टेकहोल्डर हामी पनि हौं ।

 तर संशोधन विद्येयकले त मधेशका माग पुरा हुँदैन भन्ने आन्दोनलरत्त पक्षको दाबी छ नि ?

हेर्नुस, राजनीति वा समाजमा घटनाक्रमले धेरै अर्थ राख्छ । हिजो मधेशीहरुसँगको विभेदको स्तर, आयतन र आयाम कति गहिरो र सुक्ष्म थियो । आज कम्तीमा त्यसमा कमी आएको छ । चेतनाको विकाससँगै आन्दोलनले पनि तीब्रता पाएको छ र शासकहरुलाई मधेशी जनताका मागलाई सम्बोधन गर्न बाध्य तुल्याउँदै आएको छ । तपाई र हामीले विश्वास गर्नै पर्छ कि केही वर्षयता हाम्रो आत्मविश्वास मजबूत बनेको छ। हाम्रो सम्मान, अधिकार र प्रतिष्ठामा इजाफा भएको छ । तर हामी पूर्णतया एउटा नागरिकका रुपमा अधिकारसम्पन्न भइसकेका छैनौं । लडाइँ हाम्रो पनि यही नै हो । नयाँ संविधानले आन्दोलनरत पक्षको मागलाई समेटन सकेन भनेरै हाम्रो असन्तुष्टि आएको हो र हामीले सरकारमा जाँदा आठबुँदे सम्झौता गरेका थियौं । संविधान भनेको कुनै जड विषय त होइन नि । यो जनआकांक्षाअनुरुप संशोधनीय र परिवर्तनशील हुन्छ । अहिलेको संशोधन विद्येयक पनि सीधा पारित त हुँदैन  । जनताका प्रतिनिधिहरुले छलफल गरिरहेका छन् । विश्वास गरौं, सर्वस्वीकार्य ढंगले संविधान संशोधित हुनेछ । यसो भएन भने संविधानमा थप संशोधन गराउने गुञ्जायस गर्ने विकल्प त हामीसँग रहिरहन्छ नि ।

 के तपाईंहरुको आठबुँदे सहमतिले मधेशका मागहरुको प्रतिनिधित्व गर्छ ?

हो, हाम्रो आठबुँदे मागले मधेशी र थारु जनताका मूलभूत मागलाई सम्बोधन गर्छ । अहिलेको संशोधनले त्यसभन्दा बढी  मागलाई सम्बोधन गर्यो भने मधेश आन्दोलनको उपलब्धि संस्थागत हुन्छ । होइनौं भने हामी फेरि पनि एउटा निष्कर्षविहीन अवस्थामा पुग्नेछौं । विगतमा भएका २२ बुँदे र आठबुँदे मागप्रति सरकार संवेदनशील देखिएको छैन ।

झट्ट हेर्दा तपाईंहरुको आठबुँदे सहमति पनि त उधारोमै भएको देखिन्छ नि ?

हाम्रो आठबुँदे सहमति प्रक्रियामा गइसकेको छ । त्यसैले यो सहमति उधारो हुन्छ भन्न मिल्दैन ।

आन्दोलनको बेला हो यो मधेशमा । तपाईंहरु त मधेश नै छोडेर हिजोआज राजधानीमा पो केन्द्रित हुनुभयो ?

तपाईंको बुझाइमा कमी छ । म मधेशमा छु । र, आन्दोलनमै छु । पार्टीको कामविशेषले काठमाडौं आएर फेरि पनि मधेश नै फर्कदैँछु ।

साँच्चिकै तपाईंहरुका अध्यक्ष गच्छदारलाई त सत्ताको स्थायी लोलुप भनिन्छ नि ?

उहाँ राष्ट्रिय चिन्तन बोक्नुभएका एक मात्र नेता हुनुहुन्छ यो देशमा । यो देशबाट मधेश अलग हुने अवस्थामा मधेश, हिमाल र पहाडलाई उहाँले एउटा सुत्रमा बाँध्नुभएको हो । अतिवादीहरुका बीचमा सहिष्णुता, सदभाव र एकताको सन्देश छर्ने उहाँ नै हो । यसैले गर्दा हिमाल, पहाड र तराई सबै क्षेत्रका जनताले परिपक्व, अनुभवी र सुझबुझ भएका नेताका रुपमा उहाँलाई मान्छन् ।

हिजोआज त तपाईंहरुको दल त भारतसँग वैरी गर्ने पार्टीको रुपमा चिनिन्छ नि ?

नेपाल र भारतबीच सदियौंदेखि धार्मिक, साँस्कृतिक,आर्थिक र सामुदायिक सम्बन्ध रहँदैआएको छ । देशपार विवाहको यस्तो विछट्ट परम्परा तपाईं संसारका कुनै पनि देशमा पाउन सक्नुहुन्न । त्यसैले भारतसँगको हाम्रो विशिष्ठ सम्बन्धलाई अनदेखी गर्न सकिँदैन । भारतलाई विरोध गर्ने कोही पनि राष्ट्रवादी हुन सक्दैनन् । यस्तो काम गर्नेहरुको राष्ट्रियतालाई त म नक्कली राष्ट्रियता भन्छु । मेरो धारणाभन्दा फरक पार्टी अध्यक्ष गच्छदारज्यूको पनि छैन ।

%d bloggers like this: