Wednesday, February 21, 2018
Home > समाचार > मोर्चाबाट अलग्गिने मुस्लिम गठबन्धनको घोषणा हास्यास्पद : मोर्चा

मोर्चाबाट अलग्गिने मुस्लिम गठबन्धनको घोषणा हास्यास्पद : मोर्चा

सञ्चारक
काठमाडौं, मंसीर, २२ । तराई मधेश लोकतान्त्रिक पार्टीका केन्द्रीय सदस्य शमीममियाँ अन्सारीनेतृत्वको मुस्लिम सङ्घर्ष गठबन्धनले मंगलबारबाट राष्ट्रिय स्वाधिनतामा आँच नपुग्ने तथा मानवीय संकट नहुने गरी मधेश आन्दोलन गर्ने निर्णय गरेको छ । राजधानीमा पत्रकार सम्मेलनको आयोजना गर्दै संयुक्त लोकतान्त्रिक मधेशी मोर्चाले धोका दिएको आरोप लगाएको गठबन्धनले मोर्चाबाट अलग्गिने घोषणासमेत गरेको छ । गठबन्धनले छुट्टै शान्तिपूर्ण मधेश आन्दोलन गर्ने जनाएको छ ।
मधेशी मोर्चाले सरकारसमक्ष प्रस्तुत गरेको एघारबुँदे मागमा मुस्लिम समुदायको मागलाई वेबास्ता गरिएको र मोर्चाका गतिविधिहरुमा सामेल नगराइएको भन्दै गठबन्धनले रोषसमेत प्रकट गरेको छ ।
मधेशी मोर्चाका नेताहरुले कहिल्यै पनि मोर्चाका घटक नरहेको गठबन्धनले मोर्चाबाट अलग्गिएको कुरा गर्नु ‘आश्चर्यजनक र हास्यास्पद’ भएको टिप्पणी गरेका छन् । मोर्चाको वार्ता टोलीका सदस्य एवं तराई मधेश सदभावना पार्टीका सहअध्यक्ष रामनरेश रायले अलग्गिने घोषणा ‘कुर्कुच्चो उठाएर अग्लो बन्ने’ गठबन्धनको दुष्प्रयासको संज्ञा दिनुभएको छ । उहाँले मधेशमा आन्दोलनरत्त सबै राजनीतिक दलहरुमा मुस्लिम समुदायको सहभागिता रहेकोले शमीमनेतृत्वको गठबन्धनले मधेश आन्दोलनमा मुस्लिमको सहभागिता कमजोर हुने आँकलन गर्नु मूर्खतापूर्ण हुने प्रष्ट पार्नुभयो । bigyapti
राजधानीकेन्द्रित सञ्चारमाध्यमहरुले मधेशी मोर्चाबाट गठबन्धन अल्लिगएको घटनाले मधेश आन्दोलन कमजोर भएको विश्लेषण गरिरहेको बेला मोर्चाका नेता रायले सयौं मुस्लिमसम्बद्ध संस्थाहरुमध्ये स्वतन्त्र प्रकारको मुस्लिम गठबन्धनसँग सहकार्य नभए पनि आन्दोलनमा असर नपर्ने दाबी गर्नुभयो । चुरेभावरजस्तै राज्यले नयाँ शक्ति जन्माएर मधेश आन्दोलनलाई मत्थर पार्ने प्रयासकै श्रृंखलाको रुपमा गठबन्धनको पछिल्लो विज्ञप्ति आएको उहाँले बताउनुभयो । गठबन्धनका महासचिव एवं विज्ञप्तिका एकजना हस्ताक्षरकर्ता मो.जाकीर हुसैन सत्तारुढ एमाओवादीका सांसद हुन् । मधेश आन्दोलनलाई बल प्रयोगबाट समाप्त गर्ने एमाओवादीका मन्त्रीहरुको धारणा सार्वजनिक हुँदैआएको छ ।
सदभावना पार्टीका महासचिव मनीष सुमनले मोर्चाको घटक नरहेको र मोर्चाका कुनै पनि निर्णय प्रक्रियामा संलग्न नभएको गठबन्धनले मोर्चाबाट अलग्गिएको घोषणा गर्नुलाई राज्यप्रायोजित एउटा नाटकको पटापेक्षको रुपमा उल्लेख गर्नुभयो । उहाँले मधेश आन्दोलन मधेशी समाजका सबै धर्मालम्बी, समुदाय र जातजातिका भएकाले यसबाट गठबन्धनकै कारण कुनै समुदाय अलगथलग हुने कुरा बेफ्वाँक मात्र हुने थप्नुभयो ।
गठबन्धनको प्रेस विज्ञप्तिको भाषाप्रति आपत्ति प्रकट गर्दै नेता रायले मोर्चाका कुनै नेताको चालक भएर गठबन्धनका कोही सरकारी वार्तामा सुटुक्कै बसेमा उनी घटक हुन नसक्ने दाबी पनि गर्नुभयो । सोही कुरामा सही थाप्दै सदभावना महाचिव सुमनले मोर्चाको बैठकमा कोही जबर्जस्ती बसेमा उठाउन नसकिएको मात्र हो भनी जिकीर गर्नुभयो ।
यता गठबन्धनका अध्यक्ष शमीममियाँ अन्सारीले केही मधेशवादी दलका नेताहरुले देश विखण्डन गर्ने गरी नयाँ संविधान जारी गर्ने कुराविरुद्ध आफूहरुले राष्ट्रिय स्वाधिनताको कुरा उठाएको र मधेशमा जारी आन्दोलनको क्रममा औषधिको आयात तथा एम्बुलेन्सको आवागमन अबरुद्ध गरी गराएका हिँसात्मक घटनाले मानवीय संकट उत्पन्न भएको ठहर गरी आफूहरुले त्यसो नगर्ने प्रतिबद्धता जनाएको बताउनुभयो । गठबन्धनका अध्यक्ष अन्सारी केन्द्रीय सदस्य भएको तमलोपाका अध्यक्ष महन्थ ठाकुरले समेत राज्यले मधेशको माग सुनुवाइ नगरे देश विभाजनको सोचमा जानसक्ने उल्लेख गर्दै आउनुभएको छ ।
गठबन्धनको सो घोषणापछि पनि सीमावर्ती क्षेत्रमा आन्दोलनरत्त मुस्लिम गठबन्धनसमर्थित कार्यकर्ताहरु जारी नाकाबन्दीमा संलग्न हुने र शान्तिपूर्ण प्रदर्शन जारी रहने अध्यक्ष अन्सारीको भनाइ छ ।
घटनाक्रमका जानकारहरुका अनुसार मधेशी मोर्चा र विभिन्न दलसम्मिलित संघीय गठबन्धनमा संघीय समाजवादी फोरम नेपाल, तमलोपा, सदभावना पार्टी र तमसपाबाहेक अन्य मधेशकेन्द्रित दलहरुलाई समेत सहभागी नगराउने अडान लिएका मोर्चासम्बद्ध नेताहरुले गठबन्धनलाई मोर्चाका घटकका रुपमा नलान मोर्चाभित्रै दबाब सिर्जना गरिरहेका थिए । सुरुमा मोर्चाआव्हानको आन्दोलनमा सहकार्य गर्ने भन्दै सहमति गरेको गठबन्धनले एउटा घटकका रुपमा मान्यता खोजेपछि मोर्चाका अध्यक्षहरुसमेत बिच्किएका थिए । यद्यपी तमलोपाका एकजना प्रभावशाली नेताको दबाब र फोरमका अध्यक्ष उपेन्द्र यादवको सदाशयताले सरकारसँगको वार्ता र मोर्चाका बैठकमा सहभागी गराइएका गठबन्धन अध्यक्ष अन्सारीलाई पछिल्ला बैठकहरुमा बेवास्ता गरिदैँआएको थियो ।
मोर्चाका दोस्रो तहका नेताहरुका अतिरिक्त हिन्दूवादीहरुले समेत मधेशी मोर्चाका घटकका रुपमा एउटा धर्मालम्बी वा सम्प्रदायका व्यतिmहरु सम्मिलित संगठनलाई सामेल गर्न नहुने मोर्चाका नेताहरुलाई सुझाउँदैआएका थिए । हिन्दू युवा जनशक्ति संघका अध्यक्ष विकास ठाकुरले भने मोर्चाका अध्यक्षहरुलाई भेटेर मुस्लिम गठबन्धनलाई मोर्चाका घटकका रुपमा अघि नबढाउन आग्रह नै गरेका थिए ।
सरकारसँग वार्ता गर्न केही दिनअघि वालुवाटार पुग्ने भनिएको मोर्चाका नेताहरु अचानक भारतीय दूताबास लैनचौरतिर मोडिएपछि टाइसुटमा टाँठिएर वालुटावार पुगेर एक्लिएका अन्सारीको क्रोध मधेशी नेताको दिल्ली भ्रमणपछि झन् चुलिएको थियो । गठबन्धनलाई मोर्चाको एउटा घटकसरह मान्यता दिनुपर्ने लविङ गर्दैआएका एमाओवादी सांसद एवं गठबन्धनका महासचिव जाकीर हुसैनले परिस्थितिको तरलतालाई दृष्टिगत गरी भारतीय दूताबास निकट मानिएका अन्सारीलाई विश्वासमा लिएर राष्ट्रिय स्वाधिनताको पक्षधरता र मानवीय संकटविरुद्धको विज्ञप्ति जारी गराउन अन्सारीलाई सहमत तुल्याएको बताइन्छ ।
एमाओवादीलगायतका सत्तारुढ दलले नेपालको आन्तरिक मामिलामा भारतीय हस्तक्षेप निम्तिएको आरोप लगाउँदै राष्ट्रिय स्वाधिनताको नारा घन्काउँदैआएका छन् भने मानवीय संकटको रुपमा राजधानीकेन्द्रित सीमावर्ती क्षेत्रको नाकाबन्दीलाई परिभाषित गर्दैआएका छन् ।
फोरम नेपालका अध्यक्ष उपेन्द्र यादवले केही दिनअघि राजधानीमा आयोजित एक कार्यक्रममा मधेशमा भइरहेको नरसंहार मानवीय संकटभन्दा बीभत्स रहेको बताउनुभएको थियो भने तमलोपाका अध्यक्ष महन्थ ठाकुरले २० दिनको नाकाबन्दीभन्दा दुई सय २० वर्षदेखिको उत्पीडनले मानवीय संकट उत्पन्न हुँदैआएको प्रष्ट पार्नुभएको थियो ।

Leave a Reply

Your email address will not be published. Required fields are marked *

%d bloggers like this: